Тараздың батыс шетінде заманауи жаңа мектеп ғимаратын салу үшін Жамбыл құрылыс компаниясына бір-ақ жыл қажет болды, деп хабарлайды ҚазАқпарат тілшісі, деп жазады ec-sport.kz
Бірінші қыркүйекте Тараз қаласының мектептерінде 80 043 оқушы партаға отырды, оның ішінде 7 856 бала бірінші сыныпқа барды.
Облыс орталығының шалғай аймағында Білім күні №61 мектеп оқушыларға өз есігін ашты. Жаңа білім беру мекемесі Асқаров көшесінің соңында орналасқан. Бұған дейін бұл ауданда орта білім беру мекемелері болған жоқ.
Жаңа мектептің ашылу салтанатында оқушылар мен оқытушыларды Жамбыл облыстық мәслихатының хатшысы Махметғали Сарыбеков пен қала әкімінің міндетін атқарушы Қайрат Исмаил құттықтады.
Тараз қаласы әкімі баспасөз қызметінен хабарлағандай, мектеп ғимаратының құрылысы 2021 жылдың тамыз айында басталған. 600 оқушыға арналған мектепте 30 кабинет, спорт залы, 144 орынды акт залы, кітапхана, 244 орынды асхана, медициналық кабинет бар. Төрт компьютерлік сыныпта 66 компьютер орнатылған.
Екі шеберханада балалар әртүрлі қолөнердің, атап айтқанда қыш бұйымдар жасаудың қыр-сырын үйренеді.
“Оқыту тілі – қазақ тілі. Физика, химия, биология кабинеттері, лингафонды-мультимедиялық, компьютерлік және кәсіптік бағдар беру кабинеттері озық технологиялармен жабдықталған”, – деп түсіндірді ведомствода.
Тараз қаласы әкімдігі баспасөз қызметінің мәліметінше, облыс орталығында білім бөліміне қарасты 60 мектеп, 45 балабақша, бір кешкі мектеп, төрт қосымша білім беру ұйымы, екі психологиялық-педагогикалық түзету кабинеті және “Асыл мирас” аутизм орталығы – барлығы 113 мекеме жұмыс істейді.
Таразда алдағы оқу жылында жаңа құрылыс есебінен үш ауысымды екі мектептің мәселесі шешілетін болады.
Білім күніне орай Жамбыл облысында алты жаңа мектеп пайдалануға берілді. Жаңа оқу жылында облыстың 447 мектебінде 244 мыңнан астам оқушы партаға отырады, олардың 23 мыңға жуығы — бірінші сынып оқушылары. Биыл облыстың білім беру саласын дамытуға 244,4 млрд теңге бөлінді, бұл өңірдің бір жылға арналған бюджетінің 50 пайызынан асады. 2022 жылға 22 білім беру нысанының құрылысына 7,6 млрд теңге бөлінді.
Тараз қаласының ішкі саясат бөлімі биыл бес санаттағы 19 237 оқушыны мектеп киімімен қамтамасыз ету үшін жалпы білім беру қорынан 1,9 млрд теңге қарастырылғанын хабарлайды. Өткен 2021 жылдан бастап жекелеген санаттағы отбасылардың әр баласын мектеп киімімен қамтамасыз ету үшін қаржылық көмек көрсетілуде.
