Рысқұловтық диқандар жаңа астықтың алғашқы тонналарын бастырды, деп хабарлайды ec-sport.kz порталы.
Жамбыл облысындағы астық өсіретін шаруа қожалықтарының алқаптарында орақ науқаны басталды. Наурыз айының басында Жамбыл облысында көктемгі дала жұмыстары басталып, маусымның соңғы онкүндігінде егін алқаптарына орақ түсті. Жалпы, жамбылдық диқандар масақты дәнді дақылдар орналастырылған 380 мың гектарға жуық алқаптың астығын жинауы керек.
Рысқұлов ауданының диқандары алғашқылардың бірі болып комбайндарын егіс алқабына шығарып, астық жинауға кірісті. Әлемде өздерін бұрыннан жақсы жағынан көрсеткен John Deere комбайндарының техникалық параметрлері мен жабдықталуы шаруалардың өмірін айтарлықтай жеңілдетіп отыр. Кабинасына жұмсақ орындықты салон орнатылған, ыңғайлы басқару жүйесі, кондиционер, борттық компьютері бар. Тіпті жиналған астықтың орташа түсімін есептей алатын көптеген датчиктері бар. Сыртта ауа температурасы +43-тен жоғары, бірақ комбайншылар оны сезбейді.
Рысқұлов ауданында 61,7 мың гектар күздік бидай, 53,2 мың гектар арпа орылуы тиіс. Қажетті техникалар дайын, жанар-жағармаймен қамтамасыз етуде ешқандай проблема жоқ. Бүгінге дейін екі жүз тоннадай астық жиналды.
Егін орағы – аса жауапты науқан. Астық алқабына орақ түсетін сәт қашанда тебіреніске толы, өйткені бұл сәтте орақ науқаны, фермердің жаңа өмірі басталады, деп атап өтті аудан әкімдігінде.
Рысқұлов ауданы масақты дәнді дақылдар өсіру бойынша Жамбыл облысындағы негізгі аудандардың бірі саналады – бұл дақылдарға 90 мың гектарға жуық жер бөлінген.
Облыстық ауылшаруашылығы басқармасының мәліметінше, биыл жамбылдық диқандар масақты дәнді дақылдарға – 379 мың гектар, соның ішінде күздік бидайға – 162,7 мың гектар, арпаға 216,3 мың гектар алқап бөлген. Орақ жұмыстарына 800-ден астам ауылшаруашылығы техникасын тарту жоспарлануда.
