Тараз қаласының шегіне жақында қосылған бұрынғы саяжай алабтарының тұрғындары газға, жарыққа және ауызсуға қосылатын сәтті асыға күтуде, деп хабарлайды ec-sport.kz порталы.
Шөлдала алабының тұрғындары алабты газдандыру мәселесін 2019 жылы көтерген болатын. Тараз қаласы әкімінің міндетін атқарушы Қайрат Исмаилмен кездесуде олар мердігердің жұмысты қашан бітірерін бұдан әрі күте алмайтындықтарын айтып, мәселені тездетіп шешуді сұрады. Сондай-ақ, мердігерлер жіберген кемшіліктерге байланысты алабты электрлендіру жұмыстарыда тоқтап қалды.
Тараз қаласы әкімінің міндетін атқарушы Қайрат Исмаилдың хабарлауынша, Шөлдала алабын газдандыру мәселесі жылу беру маусымы басталғаннан кейін, электрлендіру мәселесі ағымдағы жылдың қазан айында шешіледі.
“Бірақ бұл тұрғындардың өздеріне де байланысты екенін ұмытпау керек. Егер тұрғын үйлердің құжаттары дайын болмаса, массивті электр қуатына қосу проблемалы болады”, – деп атап өтті спикер.
Қала әкімдігінде биыл Шөлдала, Құмшағал, Көлтоған, Қызылабад алабтары мен 28 саяжайды таза ауызсуға қосу жоспарланған. Бұл тұрғын алабтарды қалалық инфрақұрылымға қосу жөніндегі белсенді жұмыстар басталып та кетті. Қосылған аумақтарда су құбыры желілерін салу қажет екендігі туралы қоғамдық қабылдау барысында да, қала және облыс басшылығымен жүздесулерде де бірнеше рет айтылды. Қала тұрғындарының бұл өтініштері жоспарлау кезінде ескерілді және олар “Қалалық массивтер үшін сумен жабдықтау жүйесінің құрылысы” жобасына енгізілді.
Қайрат Исмаиловтың айтуынша, жол-жөндеу жұмыстарын жүргізу барысында Шөлдала мен Құмшағал аймақтарын байланыстыратын қазіргі тозығы жеткен көпірге қарағанда қалаға қысқа жол салу мүмкіндігі қаралатын болады. Спикер жұмыс сапалы және мерзімінде орындалуы тиіс екенін атап өтті.
Айта кетейік, Шөлдала, Құмшағал, Көлтоған, Қызылабад және басқа да саяжай массивтері Тараз қаласының маңында өткен ғасырдың 70-ші жылдары бау-бақша серіктестіктері ретінде пайда болған. Уақыт өте келе ондағы аулалардың саны өсіп, мұнда ондаған саяжай пайда болды. Көптеген жамбылдықтар мен қоныс аударушылар үшін саяжай телімдері негізгі тұрғылықты жері мен табыс көзіне айналды.
Тараз халқының өсуі облыс орталығының шекарасын жақын маңдағы аудандар мен саяжай алабтарының аумағы есебінен кеңейту қажеттігін туғызды. 2010 жылы қалаға Байзақ және Жамбыл аудандары жерлерінің бір бөлігі, сондай-ақ 50 саяжай алабы берілді. Облыс орталығының аумағы 12 833 гектардан 18 787 гектарға дейін кеңейді.
