Жамбыл облысындағы Рысқұлов ауданы бірегей туристік әлеуетке ие, деп хабарлайды ec-sport.kz порталы.
Аса бай тарихи-мәдени мұраның, тамаша табиғи ландшафттардың, флора мен фаунаның алуан түрлілігінің үйлесімі оны бірегей аймаққа айналдырып отыр.
Рысқұлов ауданы археология, тарих және сәулет өнерінің әр дәуірге тән көптеген ескерткіштерімен танымал. Олардың ішінде қорымдар, діни ғимараттар, көне қоныстар мен ұрыс даласында қаза тапқан жауынгерлерге арналған ескерткіштер бар.
Аудан орталығы бұрын Луговое ауылы деп аталған Құлан ауылында орналасқан. Аудан орталығына жақын орналасқан көне қоныс мәдениет ескерткіші болып табылады және ЮНЕСКО-ның дүниежүзілік тізіміне енгізілген.
Елді мекен ертеде Ұлы Жібек жолының бір тармағында орналасқан. Сандаған шақырым жол жүріп жеткен саяхатшылар керуен сарайларға аялдап, демалып, су мен азық-түлік қорын толықтыратын. Көне қоныс VI – ХIII ғасырларға жатады және қазіргі аудан орталығының маңында орналасқан бірнеше нысаннан тұрады. Оларды зерттеу барысында әр дәуірге жататын үш мәдени қабат анықталды. Табылған заттардың ішінде шарап пен астық сақтауға арналған үлкен ыдыстар, май құюға арналған құмыралар, ою-өрнектері бар шикі кірпіштер, VII ғасырда жасалған қола қазан болды. Екі мың шаршы метрден астам аумақты аса қызықты туристік нысан болып табылатын сарай кешенінің қирандылары алып жатыр.
Рысқұлов ауданы туризмнің алуан түрлерін – тарихи-мәдени туризмді, археологиялық, этникалық, ат-спорттық, экологиялық, емдеу-сауықтыру, агротуризмді ұсына алады. Өңірдің табиғи сұлулығының ішінде бірегей қорғалатын аймақтар бар. Бұл Жамбыл облысының көне ескерткіштері, сұлу табиғаты және туризмнің алуан түрін дамытуға қажетті жоғары әлеуеті бар ең қызықты да тартымды аймақтарының бірі.
