Жамбыл облысында өңір әкімі Ербол Қарашөкеевтің халықаралық және республикалық олимпиадалардың, сондай-ақ ғылыми жобалар байқауларының жеңімпаздарымен кездесуі өтті. Іс-шараға бүгінде жоғары нәтижелер көрсетіп, өңірдің абыройын түрлі білім беру алаңдарында лайықты қорғап жүрген 129 дарынды оқушы қатысты, — деп хабарлайды «Эк-спорт» АА.
Жыл басынан бері Жамбыл облысының оқушылары халықаралық және республикалық олимпиадалар мен ғылыми конкурстарда 468 медаль жеңіп алды. Өңірлік команда 17 жыл қатарынан республикалық ғылыми жобалар конкурсында үздік атанып келеді, ал олимпиадалар қорытындысы бойынша «Үздік олимпиадалық команда» атағына ие болды. Бұл жетістіктер облыс оқушылары мен педагогтерінің дайындық деңгейінің жоғары екенін көрсетеді.
2025-2026 оқу жылында өңірде 245 мыңнан астам оқушы оқуын аяқтайды, олардың 14 437-сі – мектеп бітірушілер. Олардың арасында отандық және шетелдік беделді жоғары оқу орындарының грант иегерлері бар. Әсіресе Жамбыл облысының екі оқушысының Ұлттық бірыңғай тестілеуде ең жоғары – 140 балл жинауы ерекше мақтаныш тудырады.
Кездесуде сөз сөйлеген өңір басшысы Президент Қасым-Жомарт Тоқаевтың сапалы білімді дамыту мен жастарды қолдауға айрықша көңіл бөліп отырғанын атап өтті.
— Білімді ұрпақ – ел дамуының негізі. Өңірде дарынды жастарды қолдауға және олардың жан-жақты дамуына жағдай жасауға ерекше мән берілуде. Маңызды қадамдардың бірі – тәртіпті, білімді әрі отансүйгіш жастарды тәрбиелеуге бағытталған Бауыржан Момышұлы атындағы мамандандырылған әскери мектеп-интернатының ашылуы. Алдарыңызда маңызды кезең – кәсіби жолды таңдау тұр. Қай саланы таңдасаңыздар да, адамгершілікті және өмірдің басты құндылықтарына адалдықты сақтай білу маңызды, – деді Ербол Қарашөкеев.
Ашық диалог барысында оқушылар облыс әкіміне сұрақ қою мүмкіндігіне ие болды. «Білім-Инновация» дарынды ер балаларға арналған мамандандырылған мектеп-интернатының 10-сынып оқушысы Ғабиден Сабыралы мемлекеттік қызметте қандай қасиеттер маңызды екенін және басшылар қандай сын-қатерлерге тап болатынын сұрады.
Өңір басшысы қоғамға қызмет ету жоғары жауапкершілікті, адамдарды мұқият тыңдай білуді және әділ шешім қабылдауды талап ететінін айтты.
Бір адамның өтінішінің артында көбіне тұтас бір отбасының мүддесі тұрады. Сондықтан әрбір өтініш мұқият қарауды қажет етеді. Күн сайын түрлі мәселелер көтеріледі және азаматтар олардың шешілуін күтеді. Кейбір міндеттер уақытты талап етеді, бірақ ең бастысы – жүйелі жұмысты сақтап, халықпен бірге әрекет етуді жалғастыру, – деді облыс әкімі.
Сондай-ақ оқушыларды Ербол Қарашөкеевтің өмір жолы, мақсаттары және жастардан күтетін үміті қызықтырды. Әңгіме барысында тәртіптің, еңбекқорлықтың және білімге ұмтылыстың маңызына ерекше назар аударылды.
Ұлы Абай «Ғылым таппай мақтанба» шығармасында жастарды білімге, еңбекке және рухани кемелденуге шақырады. Адамға үлкен мүмкіндік ашатын – білім мен еңбек. Сондықтан үнемі оқуға ұмтылып, дүниетанымды кеңейтіп, алдыңа биік мақсат қойып, соған табандылықпен жету қажет, – деді өңір басшысы.
Кездесу соңында оқушыларға зор денсаулық, оқуда табыс және жаңа жетістіктер тіленді. Оларға ата-аналар мен ұстаздардың сенімін ақтап, еңбектерімен ел дамуына үлес қосудың маңызы ескертілді.
Кездесуге қатысушылар көрсетілген қолдау үшін алғыс айтып, болашақта Қазақстанның игілігі үшін еңбек етуге дайын екендерін білдірді. Барлық оқушылар облыс әкімінің Алғыс хаттарымен және ақшалай сертификаттармен марапатталды. Дарынды оқушыларды даярлаумен айналысатын педагогтер де көтермеленді.
Сонымен қатар іс-шара аясында жас ғалымдардың жобалар көрмесі ұйымдастырылып, оқушылар өздерінің ғылыми әзірлемелері мен зерттеу бастамаларын ұсынды.
